CHADEMA kuzindua kampeni Arumeru Jumamosi kwa maandamano makubwa.

Meneja kampeni wa Mgombea ubunge Jimbo la Arumeru kwa tiketi ya Chadema Vicent Nyerere amesema CHADEMA wanatarajia kuzindua kampeni zao rasmi Jumamosi asubuhi ambazo zitazinduliwa na Mwenyekiti wa chama hicho, Freeman Mbowe.Alisema kuwa uzinduzi huo utakwenda sambamba na maandamano makubwa yatakayotokea Arusha mengine yatatoka KIA na yote yatakutana eneo la Usa River katika viwanja vya eneo la mkutano.



“Mkutano huo utazinduliwa kwa kishindo kwa helkopta, magari, baiskeli na pikipiki, vyote vikiwa vinapeperusha bendera za Chadema, hivyo nawaomba wapenzi wa Chadema wafike eneo husika mapema kushuhudia uzinduzi huo,” alisema Nyerere.Alisema kutokana na maandalizi waliyofanya na jinsi chama chake kinavyoungwa mkono jimbo hilo wanatarajiwa yatakuwa ni maandamano makubwa kuwahi kushuhudiwa katika mkoa wa Arusha.



Nyerere alisema kuwa Chama chao kitafuata taratibu zote za sheria ya maandamano kwa kuelekeza wafuasi wao kutii amri ya barabarani kwa kutembea upande mmoja wa barabara na kuyaachia magari kupita na kumaliza mikutano yao kwa wakati uliopangwa wa kumalizika kwa kampeni za uchaguzi.