Mwalimu Mkuu Amtia Mimba Mtoto Wa Darasa La Saba Mpwapwa

Posted by Mjengwa | Tuesday, September 06, 2011

 Na Joyce Kasiki, Dodoma

MWANAFUNZI mmoja wa darasa la saba wa shule ya msingi Kibakwe wilayani Mpwapwa kesho  Jumatano atashindwa kufanya mtihani wa darasa la saba kutokana na kupewa mimba na Mwalimu Mkuu wake wa shule ya hiyo Anord Ng’undu (35).

Akizungumza na waandishi wa habari, Mkurugenzi Mtendaji wa Halmashauri hiyo Robarti Kitimbo alifafanua kuwa  Mwalimu huyo anashikiliwa na jeshi la polisi katika kituo cha polisi cha Mpwapwa.

“Taarifa za za mwanafunzi huyu  mwenye umri wa miaka 13 mimi nilizipata kutoka kwa watendaji wangu wa juu ambapo alikuwa anafanya jaribio la kuitoa mimba hiyo kwa kutumia madawa ya kienyeji nyumbani kwao kijiji cha Ikongola Kibakwe”alisema

Alisema kuwa kutokana na jaribio hilo hatua zaidi za kisheria zilichukuliwa kwa kumuhoji mawanafunzi huyo ambapo alimtaja mwalimu huyo kuwa ndiye muhusika mimba hiyo.

Mkurugenzi huyo alisema kuwa mwanafunzi huyo hivi sasa amelazwa katika hospitali ya Benjamini Mkapa kwa ajili ya uchunguzi na kupatiwa matibabu.

Kwa upande wake mganga mkuu wa Hospitali hiyo ya Benjamini Mkapa Dkt Ibrahim Katunda  alikiri kumpokea mwanafunzi huyo ambaye amelazwa katika wodi namba nane.

Alifafanua kuwa mwanafunzi huyo amepokelewa hospitalini hapo na kwamba anafanyiwa uchunguzi.  

Naye Mkuu wa Wilaya hiyo Darry Rwegasira alikiri kupokea taarifa hizo za mwalimu huyo kushikiliwa na jeshi la polisi.

Alifafanua kuwa suala hilo ni la kisheria hivyo  amewaachia jeshi la polisi pamoja na madaktari kwa lengo la kufanya uchunguzi wao ili kubaini ukweli wa suala hilo la mimba.